حد هنا

فى حد هناااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

ايه ده المدونه مليانه تعليقات !!!!!!!كده ليه انا مش مصدقا نفسى

هى المدونه عجباكم اوى كده!!!!!

ده انا متشجعه اوى انى اكمل واحط الصور والاخبار الجديده

ممكن لو سمحتىىىىىىىىىىىى تقولو لى

لو حد عنده اى تعليق على الكلاس بتاعنا ياريت يقولوعلشان بأذن الله نأخذه فى الاعتبار

واطفالكم بيستوعبو معانا ويرددو اللى اخذوه فى البيت ؟

وبيحبو يجيو الكلاس ولا لا؟

وياسلام بقا لما اطفالنا ان شاء الله يكبرو ويشوفو صورهم على النت مع اصحابهم

وكمان يشوفو تعليق بابا وماما اكيد بأذن الله هيفرحو

والف شكر لماما اياد واياد على تعليقاتكم اللى منوره المدونه رفعتو معنوياتى

وبأذن الله يا اياد هنشر صور الرحله قريب بس لما افضى لان التعليقات كتير اوى وبأخذ وقت لما اشوفها

بدأنااااااااااا بسم الله

السلام عليكم ورحمه الله وبركاته
الحمد لله حفله العياط الجماعى اللى الاطفال كانو بدأو فيها بمناسبه بداية العام الدراسى قربت على الانتهاء بعد ان كنا فقدنا الامل .. والاطفال اتعودو على ال class وعلى صحابهم

بأستثناء بعض الاطفال مازالو يحتفلون بطريقتهم الخاصه لانهم حضرو متأخرين او تغيبو عن classفتره

فصممو ان يكملو حفل العياط الجماعى مع انفسهم حتى لايفوتهم اى شىء وربنااااا يستررر وتخلص الحفله بقاااااا قبل ما أعمل لنفسى انا كمان حفله,

عندنا فى class متقسمين لمجموعتين مجموعه مع ميس مروه وميس مى
ومجموعه مع ميس أمل وانا
نظام اليوم الدارسى فى class
من الساعه9الى 9ونصف بنأكل (طبعا لو كان كل اليوم حصه أكل كان برده اللأكل مخلصش)علشان كده الاكل بيستمر طوال اليوم
من 9ونصف الى 10ونصف الاستاذه زهراء بتدخل علشان حصه القران الكريم (بتدخل الكلاس تحفظ الجروب الاول وبعده الجروب الثانى فى الملاهى )
وبعد كده يتم عمليه التبديل اللى موجود فى الملاهى يروح classواللى موجود فى classيروح الملاهى
وطوال هذا الوقت يتم تكرار الحروف باللغه الانجليزيه واللغه العربيه وبعض الاناشيد بأذن الله سأكتبها قريبا هنا


(A(Apple

(B(Banana

(C(Cat

أ( أرنب)

ب( بطه)

ت (تفاحه)

ث (ثعبان)

والحمد لله بداء بعض الاطفال يردد معانا

بابا يعنى father

ماما يعنى mother

اخويا يعنى brother

بأذن الله سيتم تكرار الحروف القديمه مع الحرف الجديد كل يوم حتى تثبت الحروف عند اطفالنا

وارجو منكم لو اى شكوى او ملحوظه ابلغونا بها حتى يتم حلها ان شاء الله وعدم تكرارها

قريبا بأذن الله سأضع صور الرحله وباقى صورال class

صورنا

السلام عليكم ورحمه الله وبركاته
دى بعض الصور لاطفالنا فى المدرسه بس مش كل اطفالنا اتصورو
لان الباقى كان موجود فى الدور التانى بيلعب بالعربيات فبأذن الله سيتم نشر
صورهم المره القادمه اترككم مع الصور

باسل وهو مستخبى من الكاميرا

باسل بس وهو بيخلع الجاكت

ده على الله اكبر عليه حنين جدا لو اى حد من صحابه ساعده فى اى حاجه

او قام له يركب اى لعبه يقول له شكرا ويحضنو ويبوسه بوسه زى السكر

عبد الله ومحمد هما اخوات توائم ومعاهم محمود بيمرجحهم

سباق بالحصان


الكابتن محمد وعلى فكره عمته موجوده معانا فى الكلاس اسمها هاجر

على بيغنى اغنيه العصافير ووراه كريم بيساعد باسل ابن عمته فى خلع الجاكت

سيف بقا لما يكلمك تحسى انك انتى الصغيره

بيكلمنى اكنه بيكلم نونو صغيرالله اكبر اسلوبه يضحك جدا

الصوره دى بقا بتوضح الهوايه اللى بيمارسها اطفالنا فى الفصل وماشاااااااء الله بمعدل كل يوم بيمارسوها

والهوايه هيا صب الماء من الزمزميه على الترابيزه يارب يعنا علشان نبدلها بهوايه تانيه

والله يكون فى عون الداده كل شويه تيجى تنشف الميه

مطارده بينا وبين الاشبال ليدخلو الملاهى علشان الفصول الباقيه تركز

فاطمه الزهراء الله اكبر الضحكه منها تجيب التفائل ماشاء الله

محمود ومحمد وانسجام كريم وهو بيشرب العصير

فرح وعلى وكريم وعبد الله ومحمد

محمد وكريم وعلى

على باشااااااااااااااا وهو على الحصان

اياد الله اكبر عليه ذو شخصيه وكلمه لانستطيع رفض اى راىء له ابداااااااا

او بمعنى اصح لانقدر

كريم ويوسف وعلى وعبد الله

سلوى ورنيم وفرح ومحمود ومحمد يارب يكون تجمعهم خيررررررر

لقطه جماعيه

لقطه جماعيه بس بالتاج

فرح والكابتن مؤمن ماشاء الله عليه شخصيه ودوده جدا وتصورو مصاحب الناس الحمر على راىء صاحبه فارس

(مؤمن بيروح مع kGg1)اصل الفصل عندنا مسمى الكيجى الناس الحمر لانهم بيلبسو احمر

ده بقا محمد صاحب اياد ماشاء الله عليهم يجننووووووو !!!!!! كريم ماشاء الله عليه بيدافع عن الفصل كله يعنى مثلا لما اقول لصحابه

انا زعلانه منكم عشان خرجتو بالحصان بره ييجى يقول لى باسلوبه المقنع هما ملهمش ذنب

هو اللى خرج غصب عنهم لدرجه انى بداءت اصدق ان الحصان هوا اللى غلطان مش هما

على واخوه عمرو على بقا تخصص تاليف حجج عشان ميدخلش الفصل نكون فى الفصل

يقول عايز اروح الملاهى

نكون فى الملاهى وبعد ثلاث دقائق بالضبط يقول عايز اطلع عند العربيات

ونطلع عند العربيات يقول عايز اروح

الحمام نروح الحمام يقول عايز اروح الملاهى وهكذا طوال اليوم

ولما اقول له انت عايز تروح فيين بالضبط ياعلى

يقول لى متكلمنيش دلوقتى عشان متنرفز بجد دمه خفيف جدا ماشاء الله

لقطه جماعيه

عبد الله ومحمد الاخوات التوائم الحمد لله بداءت افهم لغتهم

بس اللى لسه مفهمتهوش يعنى ايه (عايز المطره تبعنا )

واحلى حاجه لما حد يسأل على جنسيتهم يقولو احنا من مصر

الاميره ريم الله اكبر عليها رقيقه جدا

فرح وعمرالجنتل مان حقيقى شيك جدا فى معاملاته ربنا يبارك فيه يارب

توكلنا على الله

السلام عليكم ورحمه الله وبركاته
اهلا بكم فى مدرسه المدينه للغات واهلا وسهلا بكم فى baby classوارجو من الله ان نكون عند حسن ظنكم
وباذن الله من خلال هذه المدونه سيتم التواصل بينا ومعرفه ما يحدث فى class للوصول الى افضل النتائج لاطفالنا ان شاء الله

مواعيد ال class من الساعه 830 صباحا الى الساعه 1ظهرا

ونرجو منكم عدم احضار الشكولاته نهائيا ويمكن استبدالها بالكيك والبسكويت

وكذللك عدم احضار الكنز(الصفائح) والعصير الموجود فى زجاجه لسلامه اطفالنا

واستبدالها بالعصائر الموجوده فى علب ورقيه

واخر شىء نرجو عدم احضار اى نوع من انواع الشيبسى لاضراره المعروفه

وباذن الله سيتم اخباركم بما يحدث فى ال class بالتفاصيل وننتظر ارائكم واقتراحتكم للوصول

للخير لاطفالنا

والسلام عليكم ورحمه الله وبركاته