صحو النوم !!!!!!!!!

السلااااااااااااااااااااااااااااااااااام عليكم
اخيرا عدنا وعلى راىء ماما اياد (هشيل العنكبوت اللى على المدونه )وهبدأء ان شاء الله من جديد وهقول لكم كل حاجه كتكيتنا بيعملوها فينا من بعد ما رجعو من الاجاااااااازه اللى ياريت ما كانو اخذوها لان اضرارها كانت اكثر من نفعها وهتحكمو بنفسكم لما تعرفو ...وطبعا زى متعودتو منى على الاخبار الحمضانه اللى بعد الهنا بسنه واخيررررررررررا هتشوفو صور الرحله

الرحله كانت فى الاهرامات وماجيك لاند وهايبر 1

يوسف بعد ماوصلنا عند الاهرامات

وكريم باشا مع ميس امل (وفرحته بالرحله ظاهره على وشه )

كركررررررررررررررر السكررر وعلى حسين والشهره (حمبوزه لاوى بوزه)فى ماجيك لاند

كركر السكر راكب العربيه اللى انا وميس امل ابدعنا واحنا راكبينها ,,,

انا ركبت مع تقى بنت خالت باسل وتقى سبحان الله برده بنت خال كركر

وميس امل ركبت مع باسل

المهم خير اللهم اجعله خير ركبنااااااااااااا وياريتنا ما ركبنا الراجل قال لى البنزين فى اليمين والفرامل فى الشمال

بدأءنا والحمد لله لقيت نفسى بعرف اسوق وماشيه سرررررريعه ولسه بقول لتقى ايه ده انا طلعت بعرف اسوق اهوت

وقبل ما اخلص الكلمه شفت تراب وشميت رائحه بنزين واكتشفت انى مش حاسه برجلى

والراجل جه علطول وقال لى مضغطيش على الفرامل ليه !!!!!!!!

اكتشفت بقا ان الفرامل عندى انا مش عند تقى فى الكرسى التانى

بس العيب من الراجل لانه موضحش كلامه من الاول

المهم نزلت انا وتقى لقيت امل حالها من حالى بس باسل كان بيعيط

كركر وعلى وبابا على مع الدوليفين ومعاهم بنوته مش عارفه اسمها ايه

الصراحه كده كريم وعلى مطلعوش معانا الرحله يعنى صور متفبركه

بس هما طلعو بعدينا بكام يوم فقلت انشر صورهم مع صور صحابهم علشان ان شاء الله لما يكبرو ويشوفو المدونه

يتخيلو انهم طلعو معانا فى نفس اليوم

محمد خالد واقف مع مامته ومش هيعرف يشوفه غير اللى نظره سته على سته يعنى انا اساسا مش شيفاه

كريم بااااااااااااااااااااشا ياسلام حد قدك ياكيمو (بيتعامل فعلا انه ابن رئيس دوله زى ما بيقول )

الحمد لله محمد خالد عرفنا نشوفه

ابوووووووووووووووووووووو الهول

تقى والبطل باسل راكبين مع ( جيم جمل) والله فعلا بطل ده انا كنت ميته من الخوف وانا ركباه والجمل كان هيوقعنى

بس مسكتلهوش ومتهيقلى هيحرم يركب حد تانى فوق ظهره او بمعنى اصح مش هيقدر يركب حد تانى بعد كده

الاميره (جنا ) اخت باسل راكبه هيا كمان الجمل الصراحه انا بحبها جدا هيا وتقى واحلى حاجه عجبتنى فى تقى انها كانت خايفه جدا بس مبينتش لجنا وباسل انها خايفه وقعدت تقول لهم امسكو فيا ومتخفوش

باسل دويدار وكريم الشامى

تقى وسيف اخوها وجنا وباسل اخوها

كريم ومروان اللى واقف جنب كريم ولابس بنطلون اسود (واكيد كل اللى جه مدرسه المدينه يبقى عارف مين مروان اللى فى كيجى 1 الطفل الوحيد فى الدنيا اللى تلاقيه فى مكانين فى وقت واحد من غير سحر ولا شعوذه اكون فى الملاهى الاقيه هناك اروح الكلاس بتاعنا الاقيه برده هناك سبحان الله )بس الحمد لله ربنا اخذ لكل الميسات حقهم والرحله اللى قبل ديه القرد كان مصمم يخلع لمروان هدومه اه والله

الاخوه مع (ألف ارنب )

كتكيتنا داخليين ملاهى الصغنطتين اللى فى ماجيك لاند

كتكيتنا دخلو الملاهى بس الشاحن خلص ومعرفتش اكمل باقى اليوم وبرده معرفتش اصور يوسف غير صوره واحده ولااسف برده معرفتش اصور (ديمه فتحى )لانى مشفتهاش طول اليوم غير لما الشاحن خلص

بس الحمد لله كان يوم جميل ويااااااااااارب كل اللى كانو معانا فى الرحلتين اللى فاتو يجى معانا الرحله الجايه

وكل اللى مكنوش معانا يكونو معانا الرحله الجايه ان شاء الله

تخليص حق

أزيكم عاملين ايه انا عارفه انى بتأخر بين كل موضوع وموضوع بس اعمل ايه كل يوم برجع من عند كتكيتنا وانا نفسى مفتوحه على الحياه وبدخل علطول انام
المهم الموضوع ده تخليص حق يعنى ..نشرت الصور اللى عندى كلها خليط يعنى عيد ميلاد وقبل ماننقسم كلاسين وملاهى
وانا والله خااااااااااااايفه تزعلو لان فى شويه من كتكيتنا متصوروش خالص
واوعو تفهمو انى صورت صور جديده لالالالالا لسه والله
وبأذن الله كتكيتنا اللى متصوروش هعمل لهم موضوع لوحدهم واحط صورهم
ومش هحط معاهم حد من اللى صورتهم قبل كده علشان متزعلوش
صوره جماعيه
صوره جماعيه محدش فيها واخذ باله غير حمزه
ايااااااااااااااااااد وكركر السكررررررررر
كريم الشامى ومحمد امين فى عيد ميلاد يوسف واياد
هنا اشرف بس مش عارفه ليه ياهنا مش بتيجى بقالك كتير يارب يكون خير
محمد خالد صديق الصدوق بتاع اياد )ومحمود وكركرالسكر
مئه فى المئه عبد الرحمن بيقول لصحابه انا عندى بقره فى البيت
كل دقيقه وكل ثانيه ولكل حد عبد الرحمن يقابله يقول له انا عندى بقره فى البيت
ماما عبد الرحمن ايه الموضوع ده وممكن لو نفع تبعتى لنا سوره للبقره
مش عارفه بس حاسه ان الصوره دى بتفكرنى بموقف كده
حد فااااااااااااااااكر ؟؟؟؟؟؟؟
افكره لكم احسن .فاكرين لما ماما اياد كانت (_ناويه تأجر التورته ويوسف انقذ الموقف) اياد بقا زهره شباب المدرسه كان بيكمل دور ماما وبيقنع صحابه ان الاطباق فيها تورته
باسل بااااااااااااااااااااشا ايه بس الجمال ده كان ناقص كبايه شاى وتبقى وزير قاعد على مكتبه
فارس وعلى حسين وعلى عثمان وعبد الله
باسل بيدبح القطه بس مش عارفه لمين !!!!!
ريم وبطه ريم لالالالالالالالالازم كل يوم ميس امل وماما ريم يروحو يضحكو على ريم ويعملو انهم بيمرجحوها
علشان ماما ريم تتسحب وتمشى قبل ماريم تشوفها وتعيط
شوفو صحابنا كلهم بيتفرو على ايه على مصارعه بين اياد محمد خالد
ديمة مش دينا اصل كل صحابنا اول ما ديمه جت (جت متأخره شويه عن بدايه السنه ) كانو بيقولو ديمه والصراحه انا كنت بحسب فى الاول اسمها دينا لكن صحابى صححو لى المعلومه وقالى لى ديمه مش دينا ياميس
الميساااااات بيلحقو اياد وهوا منفعل على صحابه وقت مظاهره التورته
صوره جماعيه وخذو بالكم محمد خالد بيطير فيها

زهره شباب المدرسه التانى فااااااااااااارس باشا له ضحكه اتحدى اى حد لو بيعرف يضحك زيها
على عامل انه مش واخذ باله

محمد سمير و كركر السكر( له حركتين يضحكوبيعملهم دائما دى اول حركه منهم )والثانيه هتشوفوها بعد شويه

باسل معجب بالكيكه

كريم الشامى مش عارفه اقول عليه ايه ولا ايه

لما نسأله بابا بيشتغل ايه ياكريم يرفع حاجبه ويقول رئيس دوله اه والله

وقبل كده غاب خمس ايام قلت له انت مجيتش ليه ياكريم يقول لى كنت بلبس

قلت له خمس ايام بتلبس يقول

اه اصل انا بغيب فى اللبس شويه واحلى حاجه انه بيتكلم بثقه ومن غير مايضحك مع انه بيموتنا من الضحك

ولالالالازم اول مايدخل الكلاس يقول ليا انا وميس امل (انا هنأم شويه وصحونى كمان خمس دقائق اوعو تنسو )

بسم الله ماشاء الله عليك ياكريم ونفسى تبطل تغيب كتير حاول تلبس بسرررررعه مش هنخلى السنه كلها لبس

ياكيمووووووووو ولا اكمن بابا رئيس دوله هتغيب براحتك

محمد سمير اخو عبد الله سمير (التوائم )ماسك علم مصر مع انه مش مصرى
حقيقى انا معجبه بيهم جدا اول ما بداء الضرب على غزه
وهما بيقولو وبلغتهم الاردنيه ( احنا مش بنحب اليهود ضربو الفلسطينين بالطاخ وخلوهم ينزفو دم وراحو عند الدكتور)
وكمان بيقولو احنا مش هنشرب البيبسى بتاعهم احنا هنشرب ميراندا بس )
مع ان الميراندا امريكيه كمان بس حقيقى رجاله ربنا يبارك فيهم يارب

اشهدو ياناس مؤمن بيعمل ايه شايفه ياماما اياد خليفه ابنك بيعمل ايه

على حسين قلع الشوز ومؤمن بيشجعه وفرحان بيه

افطار جماعى

عبد الرحمن اللى يشوفه يقول عليه هاااااااااااااااااااادى لحد قريب كنت بحسبه كده

صدقتك ياماماعبد الرحمن لما قلتى لى انه مش كده

( حمبوزه لاوى بوزه ) على بيقول لى بابا بيقول عليا كده وعرفت ليه اخيراااااا

كتكيتنا مندمجين اوى فى الصوره دى وخاصه سيف وفارس ومصطفى

حمزه (اى حد يقول لحمزه انا اسمى ايه يقول ميس فرخه ويضحك بعدها ضحكه الله اكبر رائعه )

كركرالسكر (دى تانى بصه كركر بيعملها مش قلت لكم ماشاء الله سكر

الصوره دى بقا من زمان وفرحت جدا لانى لقيتها

خير اللهم اجعله خير كنا فى الملاهى وبعدين لقيت باسل دويدار ماسك شنطه واحد صاحبه بس مش فاكره مين لان كان لسه فى اول السنه ومكنتش حفظت اسامى كتاكيتنا كلها

بقول له رايح فين بيها ياباسل قال دى الثالثه ياميس ومشى وسابنى (قلت فى نفسى هو بيعد الشنط ولا ايه )

وعرفت للاسف بعد فوات الاوان يقصد ايه باسل لما قال (دى الثالثه ياميس )

الكابتن باسل وصحابه كانو بيرمو الشنط فى حمام السباحه

والحمد لله والشكر لله انه لسه مفهوش ماء