تخليص حق

أزيكم عاملين ايه انا عارفه انى بتأخر بين كل موضوع وموضوع بس اعمل ايه كل يوم برجع من عند كتكيتنا وانا نفسى مفتوحه على الحياه وبدخل علطول انام
المهم الموضوع ده تخليص حق يعنى ..نشرت الصور اللى عندى كلها خليط يعنى عيد ميلاد وقبل ماننقسم كلاسين وملاهى
وانا والله خااااااااااااايفه تزعلو لان فى شويه من كتكيتنا متصوروش خالص
واوعو تفهمو انى صورت صور جديده لالالالالا لسه والله
وبأذن الله كتكيتنا اللى متصوروش هعمل لهم موضوع لوحدهم واحط صورهم
ومش هحط معاهم حد من اللى صورتهم قبل كده علشان متزعلوش
صوره جماعيه
صوره جماعيه محدش فيها واخذ باله غير حمزه
ايااااااااااااااااااد وكركر السكررررررررر
كريم الشامى ومحمد امين فى عيد ميلاد يوسف واياد
هنا اشرف بس مش عارفه ليه ياهنا مش بتيجى بقالك كتير يارب يكون خير
محمد خالد صديق الصدوق بتاع اياد )ومحمود وكركرالسكر
مئه فى المئه عبد الرحمن بيقول لصحابه انا عندى بقره فى البيت
كل دقيقه وكل ثانيه ولكل حد عبد الرحمن يقابله يقول له انا عندى بقره فى البيت
ماما عبد الرحمن ايه الموضوع ده وممكن لو نفع تبعتى لنا سوره للبقره
مش عارفه بس حاسه ان الصوره دى بتفكرنى بموقف كده
حد فااااااااااااااااكر ؟؟؟؟؟؟؟
افكره لكم احسن .فاكرين لما ماما اياد كانت (_ناويه تأجر التورته ويوسف انقذ الموقف) اياد بقا زهره شباب المدرسه كان بيكمل دور ماما وبيقنع صحابه ان الاطباق فيها تورته
باسل بااااااااااااااااااااشا ايه بس الجمال ده كان ناقص كبايه شاى وتبقى وزير قاعد على مكتبه
فارس وعلى حسين وعلى عثمان وعبد الله
باسل بيدبح القطه بس مش عارفه لمين !!!!!
ريم وبطه ريم لالالالالالالالالازم كل يوم ميس امل وماما ريم يروحو يضحكو على ريم ويعملو انهم بيمرجحوها
علشان ماما ريم تتسحب وتمشى قبل ماريم تشوفها وتعيط
شوفو صحابنا كلهم بيتفرو على ايه على مصارعه بين اياد محمد خالد
ديمة مش دينا اصل كل صحابنا اول ما ديمه جت (جت متأخره شويه عن بدايه السنه ) كانو بيقولو ديمه والصراحه انا كنت بحسب فى الاول اسمها دينا لكن صحابى صححو لى المعلومه وقالى لى ديمه مش دينا ياميس
الميساااااات بيلحقو اياد وهوا منفعل على صحابه وقت مظاهره التورته
صوره جماعيه وخذو بالكم محمد خالد بيطير فيها

زهره شباب المدرسه التانى فااااااااااااارس باشا له ضحكه اتحدى اى حد لو بيعرف يضحك زيها
على عامل انه مش واخذ باله

محمد سمير و كركر السكر( له حركتين يضحكوبيعملهم دائما دى اول حركه منهم )والثانيه هتشوفوها بعد شويه

باسل معجب بالكيكه

كريم الشامى مش عارفه اقول عليه ايه ولا ايه

لما نسأله بابا بيشتغل ايه ياكريم يرفع حاجبه ويقول رئيس دوله اه والله

وقبل كده غاب خمس ايام قلت له انت مجيتش ليه ياكريم يقول لى كنت بلبس

قلت له خمس ايام بتلبس يقول

اه اصل انا بغيب فى اللبس شويه واحلى حاجه انه بيتكلم بثقه ومن غير مايضحك مع انه بيموتنا من الضحك

ولالالالازم اول مايدخل الكلاس يقول ليا انا وميس امل (انا هنأم شويه وصحونى كمان خمس دقائق اوعو تنسو )

بسم الله ماشاء الله عليك ياكريم ونفسى تبطل تغيب كتير حاول تلبس بسرررررعه مش هنخلى السنه كلها لبس

ياكيمووووووووو ولا اكمن بابا رئيس دوله هتغيب براحتك

محمد سمير اخو عبد الله سمير (التوائم )ماسك علم مصر مع انه مش مصرى
حقيقى انا معجبه بيهم جدا اول ما بداء الضرب على غزه
وهما بيقولو وبلغتهم الاردنيه ( احنا مش بنحب اليهود ضربو الفلسطينين بالطاخ وخلوهم ينزفو دم وراحو عند الدكتور)
وكمان بيقولو احنا مش هنشرب البيبسى بتاعهم احنا هنشرب ميراندا بس )
مع ان الميراندا امريكيه كمان بس حقيقى رجاله ربنا يبارك فيهم يارب

اشهدو ياناس مؤمن بيعمل ايه شايفه ياماما اياد خليفه ابنك بيعمل ايه

على حسين قلع الشوز ومؤمن بيشجعه وفرحان بيه

افطار جماعى

عبد الرحمن اللى يشوفه يقول عليه هاااااااااااااااااااادى لحد قريب كنت بحسبه كده

صدقتك ياماماعبد الرحمن لما قلتى لى انه مش كده

( حمبوزه لاوى بوزه ) على بيقول لى بابا بيقول عليا كده وعرفت ليه اخيراااااا

كتكيتنا مندمجين اوى فى الصوره دى وخاصه سيف وفارس ومصطفى

حمزه (اى حد يقول لحمزه انا اسمى ايه يقول ميس فرخه ويضحك بعدها ضحكه الله اكبر رائعه )

كركرالسكر (دى تانى بصه كركر بيعملها مش قلت لكم ماشاء الله سكر

الصوره دى بقا من زمان وفرحت جدا لانى لقيتها

خير اللهم اجعله خير كنا فى الملاهى وبعدين لقيت باسل دويدار ماسك شنطه واحد صاحبه بس مش فاكره مين لان كان لسه فى اول السنه ومكنتش حفظت اسامى كتاكيتنا كلها

بقول له رايح فين بيها ياباسل قال دى الثالثه ياميس ومشى وسابنى (قلت فى نفسى هو بيعد الشنط ولا ايه )

وعرفت للاسف بعد فوات الاوان يقصد ايه باسل لما قال (دى الثالثه ياميس )

الكابتن باسل وصحابه كانو بيرمو الشنط فى حمام السباحه

والحمد لله والشكر لله انه لسه مفهوش ماء

الاحتفال بيوم ميلاد اياد ويوسف

كل سنه وانت طيب يا أياد

كل سنه وانت طيب يا يوسف

انا عارفه ان انا أتأخرت فى طفى الشمعه بس والله مشااغل الدنيا كل يوم يطلع لى حاجه

اقول بكره ان شاء الله هنشر الصور

وهكذااااااااااااااااااااااا

تورته يوم ميلاد يوسف وأياد(ماما اياد اقول ولا اسكت ) بس تصورى يا ماما اول مره اعرف

ان فى تورت يوم ميلاد بتتأجر

ودى صوره جماعيه قبل ما التورته ترجع لصحابها

(اصل خير اللهم اجعله خير كانت التورته على الطرابيزه

وبعد ما صورتها فجأه لقيتها مش موجوده قلت لماما اياد ايه ده

انتم مأجرينها ولا ايه قالت لى ايوه واسكتى متقوليش لحد مش التورته اتصورت خلاص عايزه ايه اكتر من كده

!!!!!!!!!!!!!!!!!!!!!!!!!!ولو مش مصدقينى دورو معايا فى الصور على التورته

ده يوسف اول صوره له على المدونه بجد انا بحب يوسف اوى وهو فى الكلاس ال Banana

باااااااااااااااسل بيسو (عندنا اثنين اسمهم باسل علشان متتلخبطوش لان لون شعرهم نفس الدرجه )

ونداء لماما باسل اوعى تزعلى انا عارفه ان باسل اول مره يتنشر له صوره

وبأذن الله هيتنشر له علطول بس بجد هو اللى بيغيب كل ما بكون هصور

وعلشان تعرفى ان بيسو غالى علينا نشرت له صوره قبل ما نقسم كلاسين مع انه كان غايب يوم الميلاد

و ميس امل بتموت فيه ونفسها يكون معانا فى الكلاس بس ميس مروه وميس مى هيموتونا لو قربنا جمبه

فارس وديمه ومؤمن تحت دش التلج (لو تلحظو التورنه مظهريتش لحد دلوقتى )

وبدأ اطفالنا يظهر عليهم الاستياء من اختفاء التورته

وعملو كمان مظااااااااااااااااااااااااااهره

لكن يوسف قال لهم سكوت انا هتصرف اطمنوووووو

باااااااااااسل بيفكر فى طعم التورته

والحمد لله التورته ظهرت اخيرا

ديمه وكريم ويوسف ومحمد

صوره جماعيه قبل الاكل

صدق او لاتصدق عمر بيعمل ايه والله كلنا استغربنا جدا ان عمر الجينتل مان بيتواضع وبيلعب مع ابن خالت يوسف
وكمان عامل نفسه حصان لكن عرفنا ان ابن خالت يوسف يبقى ابن عم عمر

صوره جماعيه بعد الاكل

عبد الرحمن وهاجر ومحمد

وبس كده ومعلش الصور انهرده شويه صغيرين بس فى شويه صور كمان لليوم ميلاد اتمسحو من على الكمبيوتر
هحاول ان شاء الله اشوفهم موجودين فى الكاميرا تانى